ଭୁବନେଶ୍ୱର: ମହିଳା ସଶକ୍ତିକରଣ ନିମନ୍ତେ ଆର୍ଥିକ ସ୍ୱାଧୀନତାଠାରୁ ଅଧିକ ସୁରକ୍ଷା, ମର୍ଯ୍ୟାଦା ଏବଂ ଆତ୍ମବିଶ୍ୱାସକୁ ସୁଦୃଢ଼ କରିବା ଆବଶ୍ୟକ। ଏହି ଆତ୍ମରକ୍ଷା ତାଲିମ, ସ୍ୱୟଂ ସହାୟକ ଗୋଷ୍ଠୀ ସଦସ୍ୟମାନଙ୍କୁ ଅଧିକ ନିର୍ଭୀକ ହେବା, ସ୍ୱାଧୀନ ନିଷ୍ପତ୍ତି ନେବା ଏବଂ ଆର୍ଥିକ କାର୍ଯ୍ୟକଳାପରେ ଅଧିକ ସକ୍ରିୟ ଭାବରେ ଅଂଶଗ୍ରହଣ କରିବାକୁ ସକ୍ଷମ କରିବ ବୋଲି ଗୁରୁବାର ଦିନ ରାଜ୍ୟର ମିଶନ ଶକ୍ତି ଅଧୀନରେ 5,000 ମହିଳା ସ୍ୱୟଂ ସହାୟକ ଗୋଷ୍ଠୀ (SHG) ସଦସ୍ୟଙ୍କ ପାଇଁ ଏକ ଆତ୍ମରକ୍ଷା ତାଲିମ କାର୍ଯ୍ୟକ୍ରମର ଉଦ୍ଘାଟନ କରିବା ଅବସରରେ କହିଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ।
ମହିଳା ସୁରକ୍ଷା ଏବଂ ଆତ୍ମବିଶ୍ୱାସ ବୃଦ୍ଧି କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି ରାଜ୍ୟ ସରକାର । ଓଡିଶାରେ ଏକ ପ୍ରଥମ ପଦକ୍ଷେପ ଭାବରେ, ଜାତୀୟ ମହିଳା କମିଶନର ଅଧ୍ୟକ୍ଷା ବିଜୟା କିଶୋର ରାହତକରଙ୍କ ଉପସ୍ଥିତିରେ ଭୁବନେଶ୍ୱରର ମିଶନ ଶକ୍ତି ଭବନରେ ଆତ୍ମରକ୍ଷା ତାଲିମ କାର୍ଯ୍ୟକ୍ରମର ଆନୁଷ୍ଠାନିକ ଭାବେ ଉଦଘାଟନ କରାଯାଇଛି ।
ସମାବେଶକୁ ସମ୍ବୋଧିତ କରି ଉପ ମୁଖ୍ୟମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ ମହିଳା ସୁରକ୍ଷା ଏବଂ ଦକ୍ଷତା ନିର୍ମାଣ ସୁନିଶ୍ଚିତ କରିବା ପାଇଁ ସାଂସ୍ଥାଗତ ସହାୟତା ବ୍ୟବସ୍ଥାର ଆବଶ୍ୟକତା ରହିଛି । ସେ କହିଥିଲେ ଯେ ଏହି ପ୍ରକାରର ପଦକ୍ଷେପ ମହିଳାମାନଙ୍କୁ ଆତ୍ମନିର୍ଭରଶୀଳ, ଆତ୍ମବିଶ୍ୱାସୀ ଏବଂ ସମାଜ ଏବଂ ଅର୍ଥନୀତିରେ ସକ୍ରିୟ ଅବଦାନକାରୀ ହେବାରେ ଗୁରୁତ୍ୱପୂର୍ଣ୍ଣ।
ଜାତୀୟ ମହିଳା କମିଶନଙ୍କ ସହଯୋଗରେ ମିଶନ ଶକ୍ତି ବିଭାଗ ଦ୍ୱାରା ଏହି କାର୍ଯ୍ୟକ୍ରମ କାର୍ଯ୍ୟକାରୀ କରାଯାଉଛି। ଏହାର ପାଇଲଟ୍ ପର୍ଯ୍ୟାୟରେ, ଖୋର୍ଦ୍ଧା, କଟକ, ପୁରୀ, କେଉଁଝର ଏବଂ ଗଞ୍ଜାମ ଜିଲ୍ଲାର ୫,୦୦୦ ସ୍ୱୟଂ ସହାୟକ ଗୋଷ୍ଠୀ ମହିଳା ଆତ୍ମରକ୍ଷା ଏବଂ ବ୍ୟକ୍ତିଗତ ସୁରକ୍ଷା କୌଶଳରେ ତାଲିମ ପାଇବେ। ଏହି ପଦକ୍ଷେପର ଲକ୍ଷ୍ୟ ମହିଳାମାନଙ୍କ ଗତିଶୀଳତା ବୃଦ୍ଧି କରିବା, ବଜାରରେ ସୁରକ୍ଷିତ ଅଂଶଗ୍ରହଣ ସୁନିଶ୍ଚିତ କରିବା ଏବଂ ରାଜ୍ୟବ୍ୟାପୀ ମହିଳା ନେତୃତ୍ୱାଧୀନ ବିକାଶକୁ ସୁଦୃଢ଼ କରିବା।
ଏହି ଶୁଭାରମ୍ଭ କାର୍ଯ୍ୟକ୍ରମରେ ଓଡ଼ିଶା ରାଜ୍ୟ ମହିଳା କମିଶନର ଅଧ୍ୟକ୍ଷା ଶୋଭନା ମହାନ୍ତି, ମିଶନ ଶକ୍ତି କମିଶନର-ସଚିବ ମାନସୀ ନିମ୍ଭାଲ, ଅତିରିକ୍ତ ସଚିବ ଶୈଳେନ୍ଦ୍ର କୁମାର ଜେନା ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ମଧ୍ୟ ଯୋଗ ଦେଇଥିଲେ।