ଭୁବନେଶ୍ବର: ସଦର୍ଣ୍ଣ ସୁପରଷ୍ଟାର ଲିଜେଣ୍ଡସ ଲିଗ୍ କ୍ରିକେଟ୍ରେ ୨୬ ରନ୍ରେ ବିଜୟୀ ହୋଇଛି । ଦୁଇ ଭେଟେରାନ ଦିନେଶ କାର୍ତ୍ତିକ ଓ ଶିଖର ଧାୱନଙ୍କ ମଧ୍ୟରେ ଲଢ଼େଇ ହୋଇଥିଲା । ଶେଷରେ ବିଜୟୀ ହୋଇଥିଲେ କାର୍ତ୍ତିକ । ଚତୁରଙ୍ଗ ଡି ସିଲଭାଙ୍କ (୫୩) ଦ୍ରୁତ ଅର୍ଦ୍ଧଶତକ ସହାୟତାରେ ସଦର୍ଣ୍ଣ ସୁପରଷ୍ଟାର ପ୍ରଥମେ ବ୍ୟାଟିଂ କରି ୯ ୱିକେଟ୍ ହରାଇ ୧୪୪ ରନ୍ କରିଥିଲା । ଜବାବରେ ଗୁଜରାଟ ଜାଏଣ୍ଟସ ନିର୍ଦ୍ଧାରିତ ଓଭରରେ ୯ ୱିକେଟ୍ ହରାଇ କରିଥିଲା ୧୧୮ ରନ୍ । ଡି ସିଲଭା ଲିଜେଣ୍ଡ ଅଫ୍ ଦ ମ୍ୟାଚ ବିବେଚିତ ହୋଇଥିଲେ । ଗୁଜରାଟ ଜାଏଣ୍ଟସ ଅଧିନାୟକ ଧାୱନ ଟସ୍ ଜିତିବା ପରେ ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲେ । ପାର୍ଥିବ ପଟେଲ ଓ ମାର୍ଟିନ ଗୁପତିଲ ସଦର୍ଣ୍ଣ ସୁପରଷ୍ଟାର ପକ୍ଷରୁ ଇନିଂସ ଓପନ କରି ଦଳୀୟ ସ୍କୋରକୁ ୨୯ ରନ୍ରେ ପହଞ୍ଚାଇଥିଲେ । ଏହାପରେ ପାର୍ଥିବ (୪) ପାଭିଲିୟନ ଫେରିଥିଲେ । ଗୁପତିଲ (୨୨) ଓ ହାମିଲଟନ ମାସାକାଡଜା (୨୦) ଦଳୀୟ ସ୍କୋରକୁ ଆଗେଇ ନେବାର ପ୍ରୟାସ କରିଥିଲେ । ମଧ୍ୟଭାଗରେ କେଦାର ଯାଦବ (୧) ଓ ପୱନ ନେଗି (୨) ଦଳକୁ ନିରାଶ କରିଥିଲେ । ଅଧିନାୟକ କାର୍ତ୍ତିକ (୧୮) ବେଶି ସମୟ ତିଷ୍ଠି ପାରି ନଥିଲେ । ଚତୁରଙ୍ଗ ଡି ସିଲଭାଙ୍କ ଦ୍ରୁତ ଅର୍ଦ୍ଧଶତକ ବଳରେ ଦଳ ୧୪୪ ରନ୍ କରିବାରେ ସଫଳ ହୋଇଥିଲା । ସେ ୨୮ଟି ବଲ ଖେଳି ୬ଟି ଚୌକା ଓ ୨ଟି ଛକା ମାରିଥିଲେ । ମନନ ଶର୍ମା ଘାତକ ବୋଲିଂ କରି ୧୭ ରନ୍ ଦେଇ ୬ ୱିକେଟ୍ ହାସଲ କରିଥିଲେ ।
ବିଜୟ ଲକ୍ଷ୍ୟକୁ ପିଛା କରି ଗୁଜରାଟ ଓପନର ଅଧିନାୟକ ଶିଖର ଧାୱନ ଓ ମର୍ନେ ଭନ ପ୍ରଥମ ୱିକେଟ୍ରେ ଦଳୀୟ ସ୍କୋରକୁ ୬୩ ରନ୍ରେ ପହଞ୍ଚାଇଥିଲେ । ଭନ ୧୫ ରନ୍ କରି ଆଉଟ୍ ହେବା ପରେ ଧାୱନ ଚମତ୍କାର ବ୍ୟାଟିଂ କରି ଅର୍ଦ୍ଧଶତକ ହାସଲ କରିଥିଲେ । ଲେଣ୍ଡ ସିମୋନ୍ସ (୭), ମହମ୍ମଦ କୈଫ (୫) ଓ ଅସଘର ଆଫଗାନ (୩) ପଛକୁ ପଛ ପାଭିଲିୟନ ଫେରିଥିଲେ । ୪୮ ବଲରୁ ୩ ଚୌକା ଓ ୩ ଛକା ମାରି ଧାୱନ ୫୨ ରନ୍ କରି ଫେରିଥିଲେ । ପରେ ଦଳ ନିୟମିତ ବ୍ୟବଧାନରେ ୱିକେଟ୍ ହରାଇ ୯ ୱିକେଟ୍ରେ ୧୧୮ ରନ୍ରେ ସୀମିତ ରହିଥିଲା । ପୱନ ନେଗି ୩ଟି ଓ ଅବଦୁର ରଜାକ ୨ ୱିକେଟ୍ ପାଇଥିଲେ । ଲିଗର ପ୍ରଥମ ରାଉଣ୍ଡ ଶେଷ ହୋଇ ଦ୍ୱିତୀୟ ରାଉଣ୍ଡ ଆରମ୍ଭ ହୋଇଛି । ସଦର୍ଣ୍ଣ ସୁପରଷ୍ଟାର ୨ ପଏଣ୍ଟ ସହ ପ୍ରଥମ, କୋଣାର୍କ ସୂର୍ଯ୍ୟସ ଓଡ଼ିଶା (୨) ଦ୍ୱିତୀୟ ଏବଂ ଇଣ୍ଡିଆ କ୍ୟାପିଟାଲ୍ସ (୨) ତୃତୀୟ ସ୍ଥାନରେ ରହିଛି ।