ଭୁବନେଶ୍ବର: ଯେତେବେଳେ ଶାହରୁଖ ଖାନ ଏବଂ ସଲମାନ ଖାନ ଏକାଠି ପରଦାରେ ଆସନ୍ତି, ସେତେବେଳେ ଦର୍ଶକଙ୍କ ମହଲରେ ସୃଷ୍ଟି ହୁଏ ହଙ୍ଗମା । ପ୍ରଶଂସକମାନେ ମଧ୍ୟ ଏହି ଦୁହିଁଙ୍କ ଯୋଡିକୁ ବହୁତ ପସନ୍ଦ କରନ୍ତି । ଉଭୟଙ୍କର ପ୍ରଶଂସକମାନେ ସେମାନଙ୍କର ପ୍ରିୟ ସୁପର୍ଷ୍ଟାର୍ମାନଙ୍କୁ ଏକାଠି ଦେଖିବାକୁ ଭଲ ପାଆନ୍ତି, ତାହା ଏକ ଫିଲ୍ମ ହେଉ କି ପୁରସ୍କାର ଶୋ କିମ୍ବା ଅନ୍ୟ କୌଣସି ପ୍ରୋଜେକ୍ଟ ହେଉ। ‘କରଣ ଅର୍ଜୁନ’, ‘କୁଛ୍ କୁଛ୍ ହୋତା ହେ’ ଏବଂ ‘ହମ୍ ତୁମ୍ହାରେ ହେ ସନମ୍’ ଠାରୁ ଆରମ୍ଭ କରି ଅନେକ ଫିଲ୍ମରେ ଦର୍ଶକ ଏହି ଯୋଡିଙ୍କୁ ପସନ୍ଦ କରିଛନ୍ତି। ରିପୋର୍ଟ ଅନୁଯାୟୀ, ବର୍ତ୍ତମାନ ଆଉ ଏକ ପ୍ରୋଜେକ୍ଟ ଶୁଣିବାକୁ ମିଳୁଛି, ଯେଉଁଥିରେ ଉଭୟ ଖାନଙ୍କୁ ଏକାଠି ଦେଖିବାକୁ ମିଳିବ। ତେବେ ଯେଉଁ ପ୍ରୋଜେକ୍ଟରେ ଶାହରୁଖ ଖାନ ଏବଂ ସଲମାନ ଖାନ ଏକାଠି କାମ କରିବାକୁ ଯାଉଛନ୍ତି ତାହା ଫିଲ୍ମ ନୁହେଁ । ରିପୋର୍ଟ ଅନୁଯାୟୀ, ଆର୍ଯ୍ୟନ ଖାନଙ୍କ ୱେବ୍ ସିରିଜ୍ ‘ଷ୍ଟାର୍ଡମ୍’ର ଏକ ଅଂଶ ହୋଇପାରନ୍ତି ଶାହରୁଖ ଏବଂ ସଲମାନ । ଏହି ସିରିଜ୍କୁ ଶାହରୁଖଙ୍କ ପୁଅ ଆର୍ଯ୍ୟନ୍ ଖାନ୍ ନିର୍ଦ୍ଦେଶନା ଦେବେ।
ରିପୋର୍ଟ ଅନୁଯାୟୀ, ଆର୍ଯ୍ୟନ୍ ଖାନ୍ ଏକ ଏପିସୋଡର ଅଂଶ ହେବା ପାଇଁ ସଲମାନ ଖାନଙ୍କ ନିକଟକୁ ଯାଇଥିଲେ। ଯେତେବେଳେ ସଲମାନଙ୍କୁ ‘ଷ୍ଟାର୍ଡମ୍’ରେ ଏକ କେମିଓ ଅଫର୍ କରାଯାଇଥିଲା, ସେତେବେଳେ ଏହା ତାଙ୍କ ପାଇଁ ଆଦୌ କଷ୍ଟସାଧ୍ୟ ନ ଥିଲା। ଶାହରୁଖ ଏବଂ ତାଙ୍କ ପରିବାର ସହିତ ସଲମାନ ବହୁତ ଭଲ ସମ୍ପର୍କ ରଖିଛନ୍ତି। ତେଣୁ, ଆର୍ଯ୍ୟଙ୍କୁ ହଁ କରିବା ପାଇଁ ତାଙ୍କୁ ବେଶି ସମୟ ଲାଗିଲା ନାହିଁ । ଆର୍ଯ୍ୟନ୍ ଖାନଙ୍କ ଶୋ ‘ଷ୍ଟାରଡମ୍’ ବିଷୟରେ କହିବାକୁ ଗଲେ ଏହା ୬ଟି ଏପିସୋଡ୍ର ସିରିଜ୍ ହେବ ଏବଂ ଏଥିରେ ମୋନା ସିଂହ ମୁଖ୍ୟ ଭୂମିକାରେ ନଜର ଆସିବେ। ଏହା ପୂର୍ବରୁ ଦର୍ଶକମାନେ ଶାହରୁଖ ଖାନ ଏବଂ ସଲମାନ ଖାନଙ୍କୁ ‘ପଠାନ୍’ ଏବଂ ‘ଟାଇଗର୍ ୩’ରେ ଏକାଠି ଦେଖିଛନ୍ତି । କାମର କଥା କହିଲେ ଶାହରୁଖ ଖାନ ପରବର୍ତ୍ତୀ ସମୟରେ ସୁଜାୟ ଘୋଷଙ୍କ ‘କିଙ୍ଗ୍’ରେ ନଜର ଆସିବେ। ଏହି ଫିଲ୍ମରେ ଶାହରୁଖ ଖାନଙ୍କ ଝିଅ ସୁହାନା ଖାନ ମଧ୍ୟ ନଜର ଆସିବେ। ତେବେ ୨୦୨୬ ମସିହାରେ ପ୍ରେକ୍ଷାଳୟରେ ମୁକ୍ତିଲାଭ କରିବାକୁ ଥିବା ଏହି ଥ୍ରୀଲର ଫିଲ୍ମରେ ଅଭିଷେକ ବଚ୍ଚନ ଭିଲେନ ଭୂମିକାରେ ଅଭିନୟ କରିପାରନ୍ତି।
ସେହିପରି ସଲମାନ ଖାନ ଆଜିକାଲି ଫିଲ୍ମ ‘ସିକନ୍ଦର’ର ସୁଟିଂରେ ବ୍ୟସ୍ତ ଅଛନ୍ତି। ଚଳିତ ବର୍ଷ ଇଦ୍ ୨୦୨୫ରେ ଏହା ମୁକ୍ତିଲାଭ କରିବ। ଆର୍ ମୁରୁଗାଦାସଙ୍କ ନିର୍ଦ୍ଦେଶିତ ଏହି ଫିଲ୍ମରେ ରଶ୍ମିକା ମନ୍ଦାନା ଏବଂ ସତ୍ୟରାଜ ମଧ୍ୟ ନଜର ଆସିବେ।